შენგელია და ნეთსი ორწლიან კონტრაქტზე შეთანხმდნენ

ზოგიერთი ამერიკული საინფორმაციო საშუალების ცნობით "ბრუკლინ ნეთსი" თორნიკე შენგელიას ორწლიან კონტრაქტზე შეუთანხმდა და მალე ეს ოფიციალურად დადასტურდება.

გაზეთ "ნიუ იორკ პოსტის" ცნობით "ბრუკლინი" 300 ათას დოლარად გამოისყიდის შენგელიას კონტრაქტს მისი ძველი გუნდისგან, ბელგიური "შარლერუასგან", რათა თავად გაუფორმოს ახალბედასთვის სტანდარტული 2–წლიანი ხელშეკრულება.

20 წლის ქართველმა ფორვარდმა "ნეთსის" მწვრთნელ აივერი ჯონსონს საზაფხულო ლიგაზე მოაწონა თავი და გადააფიქრებინა ევროპაში მისი ერთი წლით დაბრუნება. შენგელია ატლანტაში ჩავიდა ზაზა ფაჩულიასთან, შემდეგ კი ნიუ იორკში ჩავა და "ნეთსთან" კონტრაქტის გაფორმების შემდეგ ავსტრიაში შეუერთდება ეროვნულ ნაკრებს.

"ნეთსი" ამ დღეებში უკვე ბოლომდე დაკომპლექტდა და შენგელია ფაქტობრივად ბოლოს მოხვდა გუნდის 15–კაციან სიაში, თუმც სასურველი იქნება, თუ 12–კაციან განაცხადშიც ჩაჯდება, რაც მას რეგულარულად მისცემს ნბა–ში თამაშის საშუალებას.

შენგელიას პლიუსად ჩაეთვალა, რომ მას ორ პოზიციაზე შეუძლია თამაში, როგორც მძიმე ასევე მსუბუქი ფორვარდის თვისებები აქვს, თუმც მძიმე ფორვარდის პოზიციაზე, სამწამიანი ზონის მიდამოებში უფრო კომფორტულად გრძნობს თავს.

"ბრუკლინს" ყველა ამპლუაში ჰყავს ნბა–ს მასშთაბით თითო ძლიერი მოთამაშე და ადვილად იკვეთება ამ გუნდის სასტარტო ხუთეული: დერონ უილიამსი (გამთამაშებელი), ჯო ჯონსონი (მსროლელი), ჯერალდ ვოლესი (მსუბუქი ფორვარდი), კრის ჰამფრიზი (მძიმე ფორვარდი) და ბრუკ ლოპესი (ცენტრი).

როგორც ვოლესს, ისე ჰამფრიზს ხუთეულში ადგილი გარანტირებული აქვთ, ამ უკანასკნელმა კლუბთან ახალი კონტრაქტი დადო (ორ წელიწადში 24 მილიონს მიიღებს) და შენგელიას წარმატებად ჩაეთვლება რომელიმე მათგანის პირველ შემცვლელად თუ ჩამოყალიბდება. აქ მას საკმაო კონკურენციის დაძლევა მოუწევს.

"ნეთსმა" ამ დღეებში დრაფტის გაუვლელად შეიმატა 26 წლის ბოსნიელი ფორვარდი მირზა ტელეტოვიჩი და ამით დააზღვია მძიმე ფორვარდის პოზიცია. ტელეტოვიჩი ევროლიგის მონაწილე ესპანურ გუნდ "კახა ლაბორალის" ერთ–ერთი ლიდერი იყო და "ბრუკლინში" მისი ყოფნა შენგელიას კიდევ უფრო გაურთულებს 12–კაციან განაცხადში თავის დამკვიდრებას.

სამინისტროს პრესსამსახური