ესპანეთთან 18:25 წაგების შემდეგ საქართველოს მორაგბეთა ნაკრებმა მსოფლიო რეიტინგში რეგრესი განიცადა და ერთი პოზიცია დაკარგა. „ბორჯღალოსნები" ევროპის ერთა თასის დასაწყისს მე-14 ადგილზე შეხვდნენ, სასტარტო თამაშის წაგების შემდეგ კი ქულები დაკარგეს და იაპონიის ნაკრები წინ გაუშვეს. თავის მხრივ ესპანეთმა საქართველოსთან მოგების შემდეგ მნიშვნელოვნად წინ წაიწია, რამდენიმეწლიანი ინტერვალის შემდეგ ოცეულში შევიდა.

Eსაქართველოს თავისუფალი სტილით მოჭიდავეთა ეროვნული ნაკრები 2012 წელს პირველ საერთაშორისო შეჯიბრზე მიემგზავრება. ქართველი მოჭიდავეები 9 კაციანი შემადგენლობით 15-16 თებერვალს უკრაინის დედაქალაქ კიევში გასამართ ტრადიციულ ტურნირზე მიიღებენ მონაწილეობას, სადაც 40-მდე ქვეყნის წარმომადგენლები ჩავლენ.    

11-12 თებერვალს ევროპის ექვს ერზე არასრული ტური გაიმართა. პარიზში საფრანგეთსა და ირლანდიას შორის გასამართი შეხვედრა უამინდომის გამო გადაიდო. ჩაშლის პირას იყო რომში იტალიასა და ინგლისს შორის მატჩი, რომელიც მოედნის გადათოვლის შემდეგ მაინც შედგა და ინგლისმა 19:15 იმარჯვა. კარდიფში უელსმა 27:13 დაამარცხა შოტლანდია და ამ თამაშში ორი ლელო, სამი გარდასახვა და ორი საჯარიმო გაიტანა უელსელთა მცველმა ლეი ჰალჰპენმა.

საქართველოს სამბოს ფედერაციამ შარშან ქუთაისში დანერგილი ტრადიცია არც წლეულს დაარღვია და საქართველოს ჩემპიონატი ერთ დღეში ჩაატია. სპორტკომპლექს "არენაში" ცხრავე წონითი კატეგორიის ჩემპიონ-პრიზიორების გამოსავლენად 14 საათი გახდა საჭირო - დილის 10 საათზე დაწყებული ტურნირი ღამის 12-ზე დასრულდა.

საქართველოს მორაგბეთა ნაკრების ესპანეთში 18:25 წაგებამდე ერთი დღით ადრე, 10 თებერვალს ქართველმა მორაგბემ მამუკა გორგოძემ საფრანგეთის ჩემპიონატში ითამაშა და ლელო დადო. გორგოძის „მონპელიემ" შინ 22:11 დაამარცხა „პერპინიანი" და ტოპ 14-ში მეოთხე ადგილზე  დამკვიდრდა. მეორე ტაიმის შუაწელს გორგოძემ ძალისმიერი შეტევა წამოიწყო და მოკლე პასით თავისი გუნდის კაპიტანი ფულგენ ოდრაოგო თითქმის ლელომდე მიიყვანა, შემდეგ კი თავად ლელოთი დაასრულა შეტევა.

საქართველოს ძიუდოისტთა ნაკრებმა ობერვარტის მსოფლიოს თასი გუნდური პირველი ადგილით ჩაამთავრა. ბეთქილ შუკვანის (60 კგ) მიერ მოგებულ ოქროს მედალს დღეს თავისი წილი ოქრო ლევან წიკლაურმა (81 კგ) მიამატა. ადამ ოქრუაშვილს (+100 კგ) კვარცხლბეკის უმაღლეს საფეხურამდე გადამწყვეტი გამარჯვებაღა დააკლდა. ზვიად ხანჯალიაშვილი (+100 კგ) კი ბრინჯაოს პრიზიორი გახდა.

ზამბიამ პენალტებში 8:7 დაამარცხა კოტ დივუარიფრიკას ახალი ჩემპიონი ჰყავს. 12 თებერვალს კონტინენტის პირველობის ფინალში ზამბიამ პენალტების სერიაში დაამარცხა კოტ დივუარი და პირველად მოიპოვა აფრიკის ეროვნებათა თასი. შეხვედრაში გოლი არ გასულა. დივუარელთა ვარსკვლავმა დიდიე დროგბამ 70-ე წუთზე 11-მეტრიანი ვერ გამოიყენა, პენალტების სერიაში კი ზამბიელებმა 8:7 იმარჯვეს. დივუარელთაგან პენლები ააცილეს ინგლისის პრემიერლიგის სხვა ვარსკვლავებმა კოლო ტურემ და ჟერვინიომ.

11 თებერვალს „სპორტის სასახლეში" საქართველოს საკალათბურთო ჩემპიონატის მორიგი ტურის მატჩები გაიმართა. ტური სენსაციების გარეშე წარიმართა - ცხრილის ზედა ადგილებისთვის მებრძოლმა გუნდებმა - „არმიამ", „ქუთაისმა", „სოხუმმა" და „შსს-აკადემიამ" დამაჯერებლად იმარჯვეს. კიდევ ერთი მოწინავე გუნდი, „ოლიმპი" კი ამ ტურში ისვენებდა. ქვეყნის ჩემპიონმა და თასის მფლობელმა „არმიამ" „დინამო" 83:66 დაამარცხა და ზედიზედ გამარჯვებათა სერია 11-მდე გაზარდა.

ზაზა ფაჩულიას „ატლანტა ჰოქსი" მიმდინარე სეზონში მესამედ შეხვდა „მაიამი ჰითს" და მეორედ დამარცხდა, ამჯერად სოლიდური სხვაობით - 87:107. ქართველი ცენტრი კვლავ სასტარტო ხუთეულში იყო და 8 ქულასთან ერთად 9 მოხსნა, 2 პასი, 1 ჩაჭრა და 1 დაფარება მოაგროვა. გასაკვირია, მაგრამ ფაჩულია ასეთი სტატისტიკითაც გამორჩეული იყო თავისიანთა შორის. იგი 9 მოხსნით საუკეთესო იყო თავის გუნდში, მასზე მეტი ქულა კი მხოლოდ უილ გრინმა (17) და ჯო ჯონსონმა (12) მოაგროვეს.