15 თებერვალს, "სპორტკაფეში" ხელი მოეწერა მემორანდუმს საქართველოს კარატეს ეროვნული ფედერაციისა და ამერიკული საგანმანათლებლო ცენტრ "LANGAთE"-ს შორის. აღნიშნული მემორანდუმი ითვალისწინებს ინგლისური ენის შესწავლას სპორტსმენთათვის. ამ შემთხვევაში კარატისტებს ამერიკული საგანმანათლებლო ცენტრი "LANGATE"-ს მოამზადებს სასურველ დონეზე უცხო ენაში.

14 თებერვალს განახლდა ევროპის ყველაზე პრესტიჟულ საკლუბო ტურნირი ჩემპიონტა ლიგა. სამშაბათს ორი შეხვედრა გაიმართა - ესპანურმა „ბარსელონამ" სტუმრად 3:1 დაამარცხა გერმანული „ბაიერ ლევერკუზენი", ხოლო ფრანგულმა „ლიონმა" შინ 1:0 მოუგო კვიპროსულ „აპოელს". ჩემპიონთა ლიგის 2011 წლის გამარჯვებულმა „ბარსელონამ" ლევერკუზენში დამაჯერებელი გამარჯვებით ფაქტიურად ფორმალობად აქცია 6 მარტს შინ გასამართი საპასუხო მატჩი.

მოგილოვში დამთავრდა ბელარუსის ზამთრის ღია ჩემპიონატი მძლეოსნობაში გაზეთ "სპორტივნაია პანორამას" პრიზზე. ჯილდოებისთვის მასპინძლებთან ერთად საქართველოს, უკრაინის, თურქეთისა და აზერბაიჯანის სპორტსმენებიც იბრძოდნენ. ჩვენი ქვეყნის წარმომადგენლებმა შეჯიბრებაზე ორი ბრინჯაოს მედალი მოიპოვეს. 400 მეტრზე რბენაში მესამე მიიჭრა ფინიშთან ოზურგეთელი ნიკა კარტავცევი. საქართველოს დელეგაციას მეორე ბრინჯაო სიგრძეზე ხტომაში მაიკო გოგოლაძემ მოუტანა.

საქართველოს საფეხბურთო ნაკრები წლეულს პირველ შეხვედრას ალბანეთის წინააღმდეგ გამართავს. ამხანაგური მატჩი 29 თებერვალს ვაკეში, მიხელ მესხის სახელობის სტადიონზე გაიმართება და 18.00 საათზე დაიწყება. საქართველოს ფეხბურთის ფედერაციის გადაწყვეტილებით თამაშზე გულშემატკივარს უფასოდ შეეძლება დასწრება. გადაწყვეტილია ისიც, რომ თამაშს მოლდოველ არბიტრთა ბრიგადა განსჯის.

საქართველოს საკალათბურთო ჩემპიონატის ერთ-ერთმა საუკეთესო გუნდმა „შსს-აკადემიამ" კიდევ ერთი ლეგიონერი დაიმატა. ხორვატი ცენტრი ალენ ტრეპალოვაცი სეზონის ბოლომდე დარჩება ქართულ კლუბში, სადაც მან გუნდთან ერთად უკვე ივარჯისა და მწვრთნელ გიორგიორ კეცელიდისის მოწონება დაიმსახურა. ტრეპალოვაცი 26 წლისაა, სიმაღლით 215 სანტიმეტრია და კლასიკური ცენტრალური თავდამსხმელია. „შსს-აკადემიაში" იგი მესამე ლეგიონერია ლარი ბლერის და ტრეისის სმიტის შემდეგ.

გერმანიის საკალათბურთო ნაკრების და „დალას მავერიკსის" ლიდერი დირკ ნოვიცკი ევროპის 2011 წლის საუკეთესო მოთამაშედ დასახელდა. მსოფლიო კალათბურთის მმართველი ორგანიზაციის, ფიბა-ს გამოკითხვით ის საუკეთესოდ დაასახელეს, როგორც გულშემატკივრებმა, ასევე სპეციალისტებმა. ნოვიცკი წლების განმავლობაში საუკეთესო ევროპელია ნბა-ში, 2011 წელს კი მან „დალასი" ჩემპიონი გახადა.

14 თებერვალს ზაზა ფაჩულიას „ატლანტა ჰოქსი" ლოს ანჯელესში „ლეიკერსთან" 78:86 დამარცხდა, მაგრამ აღმოსავლეთ კონფერენციაში მეოთხე ადგილი მაინც შეინარჩულა. ქართველმა ცენტრმა მოედანზე 27 წუთი დაჰყო. მან თამაშიდან ბურთი ვერ ჩააგდო და შეტევაში თავის გუნდს მხოლოდ ერთი საჯარიმო ქულა მოუტანა. ფაჩულა დაცვაში უფრო ნაყოფიერი იყო და 9 მოხსნა, 4 ჩაჭრა და 1 დაფარება მოაგროვა. 4 ჩაჭრა მისთვის სეზონის საუკეთესო შედეგია.